五師兄字

Subscribe RSS feed

充滿娛樂性的懸案

某日全家外出晚飯，我們早到，Jac Jac 便打電話給爺爺：「爺爺你係邊度呀？」

「唔… …」Jac Jac 一面聽電話一面點了幾下頭，像是很明白電話筒另一端所說的事。

過了段 dead air，他便收線，放低電話。

我們全檯人望著他，等他報導爺爺的去向。但他卻像是已忘了兩秒前剛剛講完的電話，竟自顧自繼續玩檯面上的刀叉碗碟。

我們便問他：「爺爺係邊度呢？」

「佢地係商場！」

「下？商場？佢地唔係黎緊食飯咩？頭先爺爺點講架？」

「唔知道呀！」

「唔知？咁點解你頭先又話知道佢地係商場呢？」

「唔知道爺爺講乜野。頭先係嬤嬤講。」（原來剛才的電話根本就唔係爺爺答，唔怪得佢話唔知爺爺會講乜……）

「咁嬤嬤又點講呢？」

「嬤嬤點講？唔記得啦！……等我打俾嬤嬤先！」他很興奮地立即拿起電話，像為了找到一個再打電話的理由而高興。

「喂，嬤嬤，你地係邊度呀？」

Jac Jac 再一次一面聽電話一面點了幾下頭，像是再一次很明白電話筒另一端所說的事。

同樣過了段 dead air，他再一次收線，放低電話。

我們又再一次望著他，期待著一個既富資訊又有娛樂性的答案。今次他主動匯報：

「嬤嬤話係餐廳！」

「餐廳？（我們立時轉身望望餐廳入口，卻不見他們的蹤影）嬤嬤話邊間餐廳呢？」

「藍色。粉紅色。黃色……」「下？？嬤嬤話果間餐廳晌邊度架？」

「佢地係香港！嬤嬤係香港！嬤嬤爺爺係香港！hee hee hee！ha ha ha！hee hee……」

聽罷，大家都莫名其妙地笑了一大餐，雖然仍然不知道爺爺嬤嬤身處何方……

及後當他們出現時我們再問嬤嬤她跟 Jac Jac 說過了甚麼，她竟說：「我也忘了！」

結果這成了一件懸案。一件耐人尋味但又充滿娛樂性的懸案。