開會為乜?

古時如果有野宣佈俾一班人聽,為了提升效率,大家會齊集於村廣場,然後聽傳信人士向眾人朗讀內容。時至今日,科技發達,大部份的資訊可以透過書信、電郵、網站等途徑發放,大家再不用親身聚集於一處。如果真的要坐在一起「開會」,那目標就不會再應是資訊的發放,而是為了那資訊的內容去表達/討論/切磋意見和制訂行動計劃。

但我常要到一些以「演講」為主題的會議。與會人士大都沒有預先研究過議題的內容,而會議的主席似乎也預料到這一點,所以亦一早預備將內容由頭到尾講一次。時間關係,等到將所有內容講完,可以再表達/討論/切磋意見和制訂行動計劃的時間/精力便不多了。

問題是,內容其實一早寫好,自己慢慢睇唔係仲好咩?為乜又要花時間聽人講一次?面對面的時間應該做番一些面對面時更應該做的事?

更大鑊的是,往往因為大家到最尾冇時間/冇精力/冇心機做討論,結果要 offline 用 email cc 全世界做罵戰。晌個會裡面明明應該傾既時候又唔傾,之後見唔到面時又抝餐飽。咁樣傾野法,誤會又多,又亂又費時失事。到最後還是要那幾個有意見的人 call 過另一個會面對面三口六面講清楚。嘥氣。

前排 Jac Jac 的家長會其實也有此效果。我們以為這個是一個與老師交流的機會,怎知竟是個幾鐘老師們做 PowerPoint presentations 由頭講到尾,最後冇 Q&A 就散 band。唔知為乜。

另一個例子:特首對著一眾議員朗讀一次施政報告(註1),大家得個「聽」字。喂!成本湖水藍既書都印好晌度咯,咁你講下D重點,其他既野D議員照計自己識睇架啦!難得有 LSD 三子攪下事掟下蕉,俾D反應。都話開會應該係切磋意見的時間,掟蕉都算是俾意見的一種吧?(註2)

(註1)當然唔係淨係特首的施政報告係咁。美國總統對兩院的國情咨文和溫總的國務院工作報告仲大鑊,棟篤笑三幾個鐘都有。

(註2)話晒呢個都係我投票俾長毛的理由。佢都只不過係兌現選舉時的承諾罷了。
(Pic Source = SingTao via Yahoo!)