Windows 7 Demo

友人傳來下面的 Windows 柒示範。

我唔識日文,所以完全唔知佢 up 乜,只見到那示範者不斷用手指敲打顯示屏面,但敲極也沒有反應,然後節目工作人員一方面插播事前錄好的片段,另一方面同時在搶救失靈中的電腦/顯示屏。最後一臉尷尬地草草收場……

究竟這真的是一趟認真(但失敗)的新產品示範,還是其實是一個攪笑節目嘗試去模擬微軟產品一貫的風格?要我估,我當然估前者,因為微軟產品落場那刻跌低以致示範者當眾出醜其實是一件平常不過的事:連 Bill Gates 自己也在台上出過藍畫面!而平日大家上台做簡報時更一定有經驗曾將所有電腦軟件冇反應、硬件瓜柴、甚至自己發台瘟的因由都全算到 Windows 品質問題的頭上!

不過,又如何?當不日大家買新電腦,我們何嘗不是又會乖乖地投回那不斷被我們嘲笑的 Windows 的懷抱當中嗎?這也好,要不然那又何來一個大眾都供認可信的藉口去解釋自己交唔出功課呢?(最常見的「理由」:做做下部機 hang / 瓜 / rebooted 左,或 saved 完個 file 唔見左)

後記:
後來整番好了,再 demo 過 ~ http://www.youtube.com/watch?v=Q_gkLVwMAW8

足球員

當快活谷大球場有四萬人為南華打氣的當兒,我們卻在另一個馬場附近與 Jacob 踢波波。

本來的活動只是帶他跑圈,但當他見到草場上有數十個足球飛來飛去,他也嚷著要落場踢。我們到辦事處借了個兒童號足球,他開心得不亦樂乎,不斷自踢自追,跟著那甩腳後的足球到處跑!當然這比齋跑圈有趣得多!

初時他因為這足球是個小號,便說只有他自己才可以玩。但經過我們的訓導,知道有人跟自己玩傳球比自己老是追波走為有趣,故之後便和我們玩三角傳球(搞到同場在射籃的無塵兄要限制活動,真的不好意思)。

觀乎他首度起腳便有如此功架,不出數年他的球藝應該可以相當不俗!但願他不會因此培養出足球腳和馬勒當拿的高度喇!(這是否擔心得過份的早呢?哈哈!)

特首姻親是 Bill Gates

在高登討論區見到有人說:「為何特首姻親不是 Steve Jobs?」(因為「我想要現金卷買Apple Product……」),使我想起多年前敝 blog 轉貼過一個笑話,是關於「如何成為另一個科技界巨頭 Bill Gates 的姻親」之方法。原文是英文,現在譯回中文重貼如下:

蔭權是個精明的政治家。某日,他捉了他的兒子來訓話……
蔭權 :我已為了揀好了老婆。
兒子 :唔好卦!封建社會咩?!我相信自由戀愛!
蔭權 :但個女仔係 Bill Gates 個女喎!
兒子 :咁,咁又唔同……

之後,蔭權便去找 Bill Gates……
蔭權 :我幫你個女搵到個好老公喇!
蓋茨 :但我幾個女都好細個咋喎!
蔭權 :但呢個年輕人係世界銀行既副總裁喎!
蓋茨 :咦,咁又可以考慮下……

最後,蔭權去找世界銀行總裁……
蔭權 :我想推薦一個年輕人做你的副總裁。
總裁 :但我已經有太多副總裁喇喎!
蔭權 :但呢個年輕人係 Bill Gates 個女婿喎!
總裁 :啊,咁似乎又可以睇睇喎……

請不要太認真,這純粹是個爛 gag。試問我們的特首又怎會這樣精明呢?

模擬周秀娜的入學面試

出試卷出到悶悶地,又唔想去煩買樓慳電膽的問題,不如跟風回帶去玩玩《模擬周秀娜對答》這題目。假設的場景是某同學在參與某教授的入學面試。

教授:你覺得呢個年紀嘅人,有乜共同特色?
同學:普遍都係唔想諗咁多問題。

教授:除咗呢樣,生活上呢?
同學:諗唔到。

教授:有乜差異?
同學:(立刻撥撥頭髮然後自信地答)有一D人靚女過另外一D冇咁靚女既人囉。

教授:你係咪覺得呢代人會好極度地享受呢種好 intensive、好 emotionally intensive?
同學:(面紅)……唔好意思,私人野,唔方便晌呢度答。

教授:自拍愉悅係咪快樂一種?自拍同反叛有冇關係?
同學:……唔好意思,乜野係如月?

教授:自拍同反叛有冇關係?
同學:(條條都唔識答,唔係好掂,點都要扮得正面和積極D)有!

教授:有冇曾經後悔?例如為讀書冇睇一場騷。
同學:邊場?

教授:對於我冇睇騷,你有乜comment?
同學:冇 comment。(又唔係同你好熟,你冇睇騷關我叉事!)

教授:依家年輕人係點?
同學:都係咁上下啦!(死啦!又答得太求其,扣晒印象分添…… 但我真係唔知佢想問乜喎!)

教授:咁你有冇衝動同欲望梳理自己?
同學:……唔好意思,乜野係 sorry 自己?(死啦!又試係咁添!下一條一定要積極D答,唔知佢想問乜都要老吹多幾句……)

教授:你覺得年輕人追求自己或做緊乜嘢係咪好重要?
同學:我覺得年輕人追求自己係好重要!雖然年中都有唔少男仔追求我,但自己追自己就未試過。年輕人只要肯試、肯學,冇野係做唔黎既!只要你今次俾機會我,讓我放膽去試,我一定可以追求到自己番黎…… …… 唔好意思,你第二 part 問乜話?追求自己或做乜話?

教授:快樂對你o黎講係咩?你快唔快樂?
同學:(咁虛無既問題,點吹?扮番佢鍾意既 style 求其答D野啦唯有……)快樂係唔使諗咁多問題,唔使理會共同特色或差異都可以如月地生活;快樂係不需要為曾經反叛而後悔;快樂係冇睇騷唔需要同人 say sorry;快樂係有好多人追求自己,包括自己。我快唔快?都快既!因為我有衝動同欲望去追求自己嘛!

結果,因為最後那段答案,這學生被獲取錄了。但又因為她不想再在校園撞見這教授,恐再被挑逗式的刁難,所以她結果還是放棄了個位。

這是純屬虛構,純粹是小弟用來解悶的笑話,不要當真!(試問教授又怎會因為最後那段答案而取錄她?)(你見佢問得第四條,就知無論之後她答乜,佢都會照收架啦!)

其他同學:
公園仔
彼德兄
電鋸兄
靚師奶
Jacky
Jansen
大鐵鎚
周秀娜

Photo source:明報 via Sina