五師兄字

Subscribe RSS feed

Jacob 語錄

自從 Jacob 識自己去廁所（除褲，shu shu，清潔，著褲，沖廁，洗手，抹手一氣呵成），識自己扣衫鈕，識自己著襪著鞋（但未識自己繫鞋帶），識自己刷牙洗面後，我們以當他是一個成年人般看待。與他傾計時有時也忘了他還是一個小孩。所以現在每次聽到他一些天真的對答便會特別有驚喜！

1.

Jacob 吃過兩顆婆婆買來的龍眼，覺得好好味，便打電話找婆婆致謝。

電話一駁通，Jacob 便急不可待地劈頭一句說：「果D龍眼好似車厘子咁呀！」

講完後，似乎對面線未聽得明他這突如其來的一句是何解，所以 Jacob 再重覆多幾遍：「果D龍眼好似車厘子咁呀！果D龍眼好似……」

之後他像在專心聽對面線問了幾句問題，然後他便答：「我打電話搵你囉，婆婆！」對面的反應似乎不是在 Jacob 預期之中，所以 Jacob 再重覆：「我打電話搵你囉，婆婆！我打電話……」

講多了幾句，Jacob 突然收線，然後一臉茫然地望著我們說：「頭先呢，頭先果個婆婆唔係婆婆黎架！」似乎他搭錯線了！

他在我們的鼓勵下鼓起勇氣再打多一次。初時他不敢聽，要我們肯定對面線真的是婆婆才肯接過聽筒。然後他便對婆婆說：「婆婆，點解呢，頭先我打俾你搵婆婆，但係唔係你聽既？」「婆婆，頭先果個係邊個黎架，你知唔知呀？」婆婆似乎和他說了幾句，然後 Jacob 便突然說 bye bye 兼收線（？！）。

收線後，他開心地對我們說：「頭先果個婆婆係婆婆黎架，不過佢冇聽電話」「之前果個婆婆都係婆婆黎架……」開始愈說愈混亂……

搞了一輪，結果真相仍然是個謎！

2.

今早送 Jacob 上學時行了一個大運，先入新界再回九龍。他發現回程時行經的隧道不是慣常的獅子山隧道，便問我這條隧道是甚麼名字。

我說是「大老山隧道」。他聽後開心笑到格格聲，說：「點解呢個隧道個名同我一樣，都係叫『大佬』既？哈哈！咁好笑！」

之後他便自問自答：「呢條隧道長D定係獅子山隧道長D呢？」「梗係呢條隧道長D啦！呢條係『大佬山』隧道嘛！」「『大佬山』隧道最長，獅子山隧道就係中間長，最短既係『山山隧道』！」（「山山隧道」是他自己改的名字，是來形容那些天橋底的~即是其實並不是隧道。）

之後他若有所思，然後忽然說：「唔，『山山隧道』即是『細佬山隧道』囉！哈哈哈哈！點解咁好笑既！『細佬山隧道』！哈哈哈哈……」