Tag Archives: photos

兒童的煩惱

天真的童言真是百聽不厭。

有天 Jacob 告訴我們他在學校有點煩惱。我們趕忙關注一下。他答:「我既同學甲成日要同我玩!」

我們問:「你唔係話過同學甲係你既好朋友黎架咩?」他答:「係!不過佢成日都要拖住我隻手,去邊都要扯埋我去!有時我唔想玩果樣野,咁佢又都要拉住我喎!搞到我冇得自己揀想玩既野來玩!」

「咁你點算呢?」「咁我咪走囉!不過好彩我走得好快!所以佢捉唔住我囉!」

「咁你另外果D朋友呢?例如同學乙?」「同學乙都係咁架!都係要捉住我玩!」

「咁咪岩囉!你地可以三個一齊玩架嘛!」「但係問題係佢地兩個都想捉住我同一隻手呢!」

「嘩!你俾人爭咁厲害!咁朋友丙呢?唔見你提起佢既?」「朋友丙都好,不過要朋友甲唔爭住同我玩既時候佢先有得同我玩囉!」

「下!咁佢都好慘喎!無端端朋友甲又唔會想放手既呀呵?」「係呀!所以都係朋友甲病左唔返學既時候同學丙先會同我地玩架!」

「咁其實晌學校裡面你最想同邊個朋友玩呢?」「朋友乙囉!」

「但你走得咁快,朋友乙捉唔住你架喎!」「係呀!所以我會特登走慢D,等佢可以捉到我囉!佢係我朋友黎架嘛!」

(註:甲乙丙三人,只有乙是女孩。)

自家製 Pizza

自家製 Pizza 簡約食譜:

批底 ~ 先將大概三茶匙 dry yeast 和少許糖溶於一杯大概 40C 的溫水中。將三杯半麵粉(如用高筋麵粉,會較脆)和少許鹽放進大 bowl 中,然後慢慢分段加進溫水。搓混。再加兩湯匙橄欖油。將其搓成波狀,在溫暖環境下發酵一個鐘。橄欖油的作用是來使批底變脆。沒有橄欖油的話,乜油都得。(傳統的意大利 pizza 甚至會用豬油!)

批頂 ~ 先搽茄羔,再落碎 Mozzarella cheese,再加自己喜歡的料(如火腿、Pepperoni、菠蘿、牛油果、車里茄、青紅黃椒、黑欖等)。磨菇會出水,遲點落為妙。

~ 放批於 pre-heat 的 pizza stone 上在焗爐用大概 230C 焗 10~15 分鐘。其間會見到 Mozzarella cheese 會溶為一起,而且批邊會脹起。最後香味溢至,即成。

食評 ~

  1. 我們用了註明是用作弄 pizza 的麵粉,但質地很怪(見下圖)。而且,我們先落水後落粉,水份控制不好,所以粉團太濕了。
  2. 粉團太濕其實對於最後製成品的味道、口感似乎沒有太大影響,只是搓皮時很難成形(也做不到將批皮向天拋的表演)。
  3. 那些 Mozzarella cheese 超好味,又好玩(Jac Jac 玩「拉絲」),但勁肥。下次一定要用低脂甚至是脫脂。
  4. 車里茄、青紅黃椒、磨菇等對味道冇乜貢獻,反而菠蘿和黑欖就不錯。火腿最好有咁薄得咁薄,如果唔係就會成塊甩出來。
  5. 我相信那 pizza stone 是超重要的。但這只是一個估計,因為我們沒有這東西。我們傻瓜地分別試過用錫紙、牛油紙來墊底,結果,黐到阿媽都唔認得。要逐忽搣返出來才可以吃。如果放在 pizza stone,個批底就會又脆又唔會黐。但唔知香港邊度有得買。
  6. 好唔好食?你睇臨尾 Jacob 的食相便知啦!